Na 17 jaar het Raymond en Roza Rabe besluit om die tuig finaal neer te lê - hoofsaaklik om gesondheidsredes. Hulle het bekendheid verwerf met hulle bedrywige en suksesvolle besigheid, R&R Aluminium in die Industriële gebied.
Gelukkig groet hulle nie vir Gansbaai nie, terwyl daar ook op die naam R&R Aluminium deur die nuwe eienaars, Heinrich van Rensburg en Chris Young voortgebou gaan word. (Berig op bl 7). Die egpaar het mekaar in 1988 ontmoet en is op 5 Desember 1995 in die huwelik bevestig. Aan die einde van 1998 open hulle die welbekende R&R Aluminium se deure wat hulle vir die daaropvolgende 17 jaar suksesvol sou bedryf. Roza se kennismaking met die glasbedryf het by Clear Glass Seepunt begin, waarna sy haar eie glasmaatskappy, Elite Glass in 1983 in Parow geopen het. Hulle was ook stigterslede van die Birkenhead Boothengelklub, met altwee wat vir vele jare op die bestuur gedien het. Raymond het vanaf 2002 tot 2013 (11 jaar) as voorsitter gedien en was self ‘n kranige boothengelaar op sy boot, Laura 2, met vele pryse wat hy ingepalm het.
Gedurende Februarie 2014 word Roza met ernstige kanker gediagnoseer en is sedertdien onder behandeling. Raymond het gedurende Augustus verlede jaar onverwags by die werk inmekaargesak. Hy was aanvanklik in ‘n koma en daar is gevind dat hy twee bakterieë opgedoen het. Raymond se bene is altwee geamputeer, asook van sy vingers. Intussen gaan dit onder omstandighede goed met hom waar hy in Herberg-aan-See opgeneem is. Met hierdie terugslae met verwysing na altwee se gesondheid, is daar op die verkoop van R&R Aluminium besluit.
“Ek het volle vertroue in die nuwe eienaars van R&R Aluminium en wens hulle alle sterkte toe,” het Roza gesê. “Van ons kant af wil ons graag al ons kliënte oor al die jare opreg bedank vir hulle wonderlike ondersteuning, asook onvergeetlike ondersteuning deur kennisse en vriende tydens my eie en Raymond se gesondheidskrisisse.”
Hardus Botha