Vanjaar spog Academia met ‘n allemintige 270 graad agts. Die eerste week het in ‘n oogknip verbygesnel. Die graad agts het reeds Dinsdag, 12 Januarie by die skool aangesluit. Vanaf Woensdag het hulle ‘n stewige oriëntasie program gevolg. Die leerders is ingelig van die “Sharkie Brand” en tradisies wat die skool in plek het.
Vrydag is ‘n nuwe tradisie begin met ‘n graad agt sportbyeenkoms. Leerders het die kans gehad om aan al die verskillende baan- en velditems deel te neem. Die beste presteerders sal Vrydag, 22 Januarie aan die skool se interhuis-atletiekbyeenkoms deelneem.
Die Vrydagmiddag en -aand was die tradisionele inlywings-seremonie waar die “Nemos” Sharkies word. Tydens die funksie het leerders lekker kaskanades saam met die matriekraad gehad, geleer om in groepe te werk, leierskap bespreek, VRL kandidate genomineer en lekker konsert gehou. Aan die einde van die verrigtinge was die spesiale inlywingsseremonie. Mnr Wilson, prinsipaal, het elke leerder se kersie aangesteek en hulle offisieel as Sharkies ingelyf. Dit was verblydend om te sien hoeveel van die ouers die seremonie bygewoon het. Nou is dit skour aan die wiel en mik vir oor vyf jaar in die matriekklas van 2020.
Liezel Mostert