Die Golden Oldies Karavaanklub is terug by Strandskloof Karavaanpark van Tot en Isabel Fourie, met hul regterhand Anje Badenhorst (administrasie) - beslis ‘n teken dat daar heerlik by hulle gekamp word.
Weer eens ‘n bewys dat hulle nie verniet verlede jaar as Traveler en Sanlam se Top Destination Awards in die Walled City in Ratanga Junction as algehele wenner (Goud) aangewys is nie.
Op ‘n vraag aan die voorsitter van die Golden Oldies, Eric Smith of hulle bewus is van genoemde toekenning, is daar dadelik verskeie koerante met relevante beriggewing uitgehaal om te wys en te sê hulle het ook vir Strandskloof gestem en is deeglik bewus van die welverdiende toekenning. “Hierdie keer was ons ‘n raps minder kampeerders as ‘n vorige keer,” het Eric gesê. “Wat interessant is, is die toename in enkellopendes, veral dames, wat lede is en saam kom kamp het.” Nege karavane het hulle Januarie-kamp na Strandskloof meegemaak, waarby 14 lede ingesluit was. “Of ons ‘n groot groep is, of soms ‘n kleiner groep, dit is altyd baie lekker en gesellig, aangesien ons soos ‘n familie bymekaar is.”
Eric is vol lof vir die aandag wat die eienaars aan hulle skenk om dit so aangenaam as moontlik vir hulle te maak. “Die mini-gholfbane is vir ons oopgesluit en ons is onder andere met paaseiers bederf,” sê hy.
“Boonop is die wenners almal met pryse beloon.” Die Golden Oldies Karavaanklub is sowat 28 jaar gelede gedurende Maart 1987 gestig. Hulle was die eerste Golden Oldies Karavaanklub in die land en die lede bestaan almal uit afgetredenes wat reeds met pensioen is. Die kampe word baie informeel aangebied, maar Woensdagaande is dit ‘n “bring-en-braai-aand”, wat ook ‘n kort vergadering insluit.
Vir navrae en/of besprekings kan Anje Badenhorst by 082-721-4381 gekontak word, of stuur ‘n e-pos aan die span by strandskloofpark@omail.co.za.
Hul webtuiste is www.strandskloofpark.co.za.
Hardus Botha
