Naderende BARC-Gholfdag

Die groot dag vir BARC se Gholfdag op Saterdag, 26 Maart 2016 kruip nou nader. Die Bestuur sien met opgewondenheid uit na ‘n suksesvolle dag, mits die ondersteuning, spelers en borge net so opgewonde is.

Gansbaai se Birkenhead Animal Rescue Centre (BARC) is ‘n geregistreerde Dieresorg Trust (IT 3001/2009) en is bykans in geheel van fondsinsamelingsprojekte afhanklik. “Die ondersteuning van BARC se tweedehandse winkel help ons ook baie en ons is opreg dankbaar daarvoor, hetsy met verkope aan die gemeenskap, óf met die beskikbaarstelling van tweedehandse items,” sê Annalie Jonker van BARC. Dit is ‘n feit dat hulle nie net agteroor sit en vra vir geld nie. Annalie sit ‘n enorme hoeveelheid arbeid en organisering in om BARC aan die gang te hou en sorg ook vir gereelde fondsinsamelingsprojekte. Nou is dit hulle daadwerklike poging om ‘n sukses van die komende Gholfdag te maak.

“Ons vra nou reeds die gemeenskap en voornemende spelers en borge om ons te ondersteun,” sê sy. Hulle beplan ‘n ‘Better Ball’ of ‘n ‘Single Stableford’ gholfkompetisie, afhangende van donasies en pryse wat hulle gaan ontvang. “Voornemende borge word beleefd versoek (“implored”) om R1,000.00 per putjie te borg, asook vir geskenkbewyse en produkte wat as pryse benut kan word.” Sodanige borge kan dan by die relevante plekke adverteer. ‘n Deel van die winste gaan ook vir opleiding benut word, asook om vanjaar weer ‘n gesubsidieerde sterilisasie-dag aan te bied. Annalie sê BARC bedien sowat 6,500 huishoudings in ‘n area van ±1,000 vk km. Voornemende gholfdag-ondersteuners kan gerus met Annalie in verbinding tree, waar ‘n amptelike skrywe oor die gholfdag ook beskikbaar is.

Vir navrae en/of skenkings/donasies, ook aan BARC se tweedehandse winkel, kan Annalie Jonker by 082-826-0631 geskakel word en vir diereprobleme en/of die aanneem van diere Nols Jonas (Veldwerker) by 083-742-3903.

Hardus Botha

Gansbaai Naderende BARC Gholfdag_1