Academia het weer eens op 12 Maart geskiedenis gemaak met ‘n winterkode interhuis sportdag. Die drie huise het teen mekaar gekompeteer in netbal, hokkie, sokker en rugby. Die Maroon-span het skoonskip gemaak in die rugby, netbal en hokkie en die Goud-span het die sokker gewen. Die algehele wenner van die dag was die Maroon-span.
‘n Paar leerders wat aangewys was as seun en dogter van die wedstryd was Wyzelle Philander (O/14 rugby), Merchin Fick (O/15 rugby), Chrizano Puff (O/16 rugby), Delon Dreyer (O/19 rugby), Willene Dreyer (O/14 netbal), Casey Booysen (O/15 netbal), Bianca Kruger (O/16 netbal), Akholewe Ziykwana (O/19 netbal), Sibosiso Gelem (O/15 sokker), Tanita Apolisi (O/15 sokker), Asiphe Klaas (O/19 hokkie) en Eugene Jacobs (O/19 hokkie). Die dag het ook sommer gedien as proewe om die beste spanne te kies vir die seisoen wat voorlê.
Die groot hoogtepunte van die dag was die wedstryde teen Eben Dönges wat al die pad van Kraaifontein gekom het. Die onder 19 meisies netbal het behoorlik gekook en die span het behoorlik oor hul oponente geloop met ‘n eindtelling van 23 – 0. Die dogter van die wedstryd was Akholiwe Ziykwana. Die onder 15 rugby span het hul wedstryd 17 – 12 gewen en die seun van die wedstryd was Adam Mitchell. Die groot kanonne, onder 19 rugbyspan, het hul wedstryd 32 – 7 gewen. Drië is gedruk deur Christiaan van Dyk, Roberto-Baso Lottering, Eacwinn Rossouw, Victor Abrahams, Nardie Groenewald en Alexander Goss. Die seun van die wedstryd was Dumisa Matlwa.
Hierdie suksesvolle dag sal beslis volgende jaar weer op die kalender wees. Academia vat Eben Dönges weer aan met die groot byeenkoms in Kraaifontein die 23e April.
Liezel Mostert
