Lekker naweek vir Huis E

 “Met ons aankoms in Gansbaai die Vrydagaand, het ons eers bietjie verdwaal op soek na Oom Bokkie Botes se huis waar ons sou oornag,” vertel een van Herberg Kinderhuis (Huis E) in Robertson se dogters. “Gelukkig het alles goed verloop en ons het geskenkpakkies van Tannie Marie le Roux en haar dogter, asook Tannie Amelia du Toit ontvang.”

Onder bespreking is Herberg Kinderhuis te Robertson se Huis E dogters wat weer ‘n naweekkuier in Gansbaai kon geniet. Aan die spits van hierdie jaarlikse kuierreëlings staan Lukas en Stienie Geldenhuys van De Kelders en hulle word jaarliks deur Dries en Susan van Heerden van Franskraal bygestaan. Huis E se Koshuismoeder, Bettie Adams het die 9 dogters vergesel: Celeste Maree, Ella Pieterson, Fredeline Bester, Janine Olivier, Jasming he Denpers, Lee-Anne Pelceur, Nasherly Otto, Nikita Visagie en Sonja Martins. Saterdag is ‘n besoek aan die African Penguin & Seabird Sanctuary (APSS) in Kleinbaai gebring. Daarna is ‘n smaaklike ontbyt in die Great White House genuttig, klere is gekoop, De Kelders se grotte is besoek, asook 7de Laan van Coenie en Christa van Dyk.

Daarna is daar heerlik ontspan en geswem, waarna daar die aand huisgodsdiens onder leiding van ds Dennis en Pat Naidoo, asook past Jolandie Sauls gehou is. Lukas en George het vir die braaiery gesorg, met Stienie en Christelle vir die slaai. Sondag het die groep die Erediens van die NG-gemeente bygewoon, waarna hulle na Herberg-aan-See is om vir die inwoners te sing en lekkergoed uit te deel. Na verdere ontspanning en kuier en middagete was dit weer tyd om die tasse te pak en terug te keer - na nóg ‘n heerlike naweek in Gansbaai.

“Sonder ondersteuning, mense se betrokkenheid en bydraes kan hierdie jaarlikse uitstappies nie plaasvind nie,” sê Stienie. “Daarom ‘n spesiale dankie aan almal, te veel om hier op te noem, wat betrokke was.”

Hardus Botha

Die groep gelukkige dogters van Huis E saam met die twee hooforganiseerders, Stienie Geldenhuys (middel) en Susan van Heerden (links)
Gansbaai_Lekker_naweek_vir_Huis_E_2