Op 17 Maart vanjaar het Johan van der Mescht van Franskraal aan die WP Skiet-kampioenskappe deelgeneem en wel in die geweer- en “handgun”-afdelings. Soos in die geval van vorige beriggewings, het Johan weer behoorlik “geblom” tydens die kampioenskappe, met die volgende uitstekende uitslae: Geweer-teleskoop-afdeling: 2 x 2de plekke en 1 x 3de plek; Geweer-oop-visier-afdeling: 3 x 1ste plekke; Onbeperkte “handgun”-afdeling: 1 x 2de plek; Sport-“handgun”-afdeling: 1 x 1ste plek en 1 x 2de plek; Lug-pistool-afdeling: 1 x 1ste plek.
“Soos gewoonlik was die Suid-Ooster ‘n faktor om mee rekening te hou,” vertel Johan. “Die teikens op die ver afstande wat met die agtergrond saamsmelt, was ‘n groot uitdaging, veral in die oop-visier-afdelings.” Johan sê egter dat goeie tellings behaal is, veral deur die dames. Op die foto (bl 22) is die verskillende grootte teikens wat van die kleinste tot die grootse met die oop-visier-gewere en oop-visier-“handguns” onderskeidelik op 25m, 50m, 75m en 100m geskiet word. “Wat hierdie sportsoort besonders maak, is die goeie sportmangees en kameraadskap tussen al die deelnemers,” is bykans met elke berig Johan se kommentaar. Die volgende kampioenskappe wat vanjaar nog voorlê, is die Wêreldskiet, WP-Classic en die Atlantis Classic.
Hardus Botha