“Dis skrikkeljaar en Aletta Löchner en Marie de Jager wat die Bietoubosbyeenkoms van 12 April met hulle span moes reël, het nie op hul laat wag nie: die manne - dis nou die manne van die NG Mannekoor - is genooi… en hul het Ja gesê,” vertel Elizma de Lange van die Bietoubos Damesklub van Perlemoenbaai en De Kelders.
Daar is op ‘n Manne-kuiteparade besluit. Die manne, wat vir skrikkeljaar soos “statige” dames moes aantrek, het agter die gordyn stelling ingeneem. Net hulle kuite kon gesien word, met ‘n naambord langsaan. Die Bietoubossers moes raai-raai totdat die regte man by die regte kuite uitgekom het. Interessante opmerkings is gehoor: “Mooi kuite - sou selfs vir ‘n vrou mooi gewees het”; “Dun kuite - kan net Hennie s’n wees”; “Wie’t nou gedink die manne kan sulke mooi kuite hê?”!
Soos die kuite aan die regte naam gekoppel is, moes hulle een-een te voorskyn kom om hul “uitrustings” te vertoon. Daarna het die manne die dames beloon met hul uitstekende koorsang onder begeleiding van Aletta Löchner, met die opmerking: “Hulle het nie net mooi kuite nie, hul kan nog mooi sing ook!” Die gasvroue en hul span se heerlike versnapperinge het ook vir die manne se “aptyte” voorsiening gemaak.
Die Bietoubossers se byeenkomste vind elke tweede Dinsdag van die maand plaas en dames van De Kelders, Perlemoenbaai en Gansbaai kan die voorsitter, Annette van Zyl by 028-384-1075 skakel, of skakel vir Elizma de Lange by 028-384-1963.
Hardus Botha
