Wat ‘n wonderlike fantastiese gevoel is dit nie om na ‘n paar jaar se harde werk en ondersteuning vanuit die skool en die gemeenskap met die opgradering van Laerskool Gansbaai se Netbal- en Tennisbane te begin nie,” sê Chrizülene van Niekerk, organiseerder van die projek. “Dit is meer as 40 jaar gelede wat die bane gebou is en die nodige opknappingswerk het broodnodig geword.”
Sy sê as gevolg van die hoë kostes om hierdie bane oor te doen, is ‘n projek wat die skool net eenvoudig nie kan bekostig nie. “Tyd vir inspring en fondse te in was egter al wat nodig was.” ‘n Hele paar fondsinsamelings soos hoenderbraaie, hamburgeraand en vroue-oggende is gereël, maar die opknappingswerk kon steeds nie begin word nie.
“Maar toe kom daar ‘n groot ommeswaai van drie besighede, by name Gansbaai Superspar, Atlantic Abalone en Aqunion en dadelik het die opgradering ‘n realiteit geword - wat ‘n fantastiese voorreg!” Soos op die meegaande foto’s gesien kan word, het die werksaamhede op 20 April 2016 begin en sake verloop sommer baie goed. “Opdatering en die voltooiing van die projek sal eersdaags volledig gepubliseer word,” sê Chrizülene. “Baie dankie aan elkeen wat gehelp het om tot hierdie projek by te dra.”
Eerskomende Vrydag, 29 April word daar weer ‘n hoenderbraai gehou om nog so ‘n bietjie fondse vir die projek te in. Kaartjies is nog beskikbaar teen R50,00 en sluit die volgende in: ‘n halwe hoender, aartappelslaai, kerrienoodleslaai en ‘n broodrolletjie.
Vir navrae en/of kaartjies kan Chrizulene van Niekerk by 082-873-6889 gekontak word of stuur ‘n e-pos aan haar na park48@telkomsa.net.
Hardus Botha
