‘n Pragtige inisiatief van Share besorg nou welwillendheidsgeleenthede aan besighede en weldoeners in Gansbaai. “Het u al beraadslaag om iets goeds vir die gemeenskap van Gansbaai te doen, maar nog nie sover gekom om dit te doen nie?”, is Share se vraag en dan vertel die Bestuur dat hier nou ‘n unieke geleentheid daarvoor is:
“Koop ‘n ‘Share - boekie’ met 10 kaartjies by ‘Share’ se perswinkel in Gansbaai, op die hoeke van Hoof- en Skuinsstraat. Elke kaartjie verteenwoordig R5.00 wat aan die draer van daardie kaartjie ‘n koppie sop en 4 snye brood gaan voorsien gedurende die koue wintermaande.
U kan aan die draer van die kaartjie ‘n klein werkie gee, soos byvoorbeeld ‘n sakkie rommel optel, of tuinwerkies, of iets wat u goeddink, en wat redelik is om te laat doen, in ruil vir die kaartjie. Andersins kan u net aan ‘n kind, ‘n ouer persoon en/of volwassene op straat, wie sorgbehoewend is, die kaartjie oorhandig.
So doen u ‘n deel om Gansbaai se gemeenskap te help versorg. Die fondse help dan weer vir ‘Share’ om die sopgroente en brood te bekom, en so sit ons ‘n bal aan die rol vir behoeftiges gedurende die wintermaande, en ons doen elkeen ons deel. Terselfdertyd lewer ons ‘n groot bydrae om dwelm- en drankgelde te verhoed, aangesien die kaartjies net vir sop en brood verruil kan word.”
Die sop en brood sal vanaf Maandae tot Vrydae, daagliks vanaf 13:00, by ‘Share’ aan die draer van elke kaartjie oorhandig word. Gaan loer ook gerus in vir vele handige items in die perswinkeltjie. Share staan vir: S - Social; H - Health; A - Animals; R - Rehabilitation & Restoration; E- Education (ECD).
Verdere navrae rakende hierdie kosbare geleentheid om ‘n deeltjie te doen deur ‘n boekie met kaartjies te koop, kan aan Rachel Engelbrecht by 076-439-8965 gerig word.
Hardus Botha
