“Herberg-aan-See Tehuis vir Bejaardes nader nou vinnig 2016 se halfpadmerk,” sê John van Rooyen, Bestuurder. “Dan raak dit gewoonlik tyd om weer eens en nogmaals opreg dankie te sê aan ons vele borge, donateurs, vrywillige werkers, individue, ondersteuners, Gansbaai Goue Hande en die Beheerraad.”
John het ook enkele nuusberiggies verskaf. Suster Neolene Kleyn is met ingang van 1 Maart 2016 as Assistant Bestuurder aangestel. Daar is onbaatsugtige werk van Gansbaai Goue Hande verskaf onder die bekwame leiding van Francia van Dyk: Stimulasie-oefeninge (Dalene van Dyk), sportgeleenthede (binnens- en buitenshuis), speletjiesdae, spesiale etes en ander bederfies, hare-doen, voet- en naelversorging en veel meer. Die Bietoubos Damesklub speel ook gereeld ‘n rol. Hierdie keer het hulle op inisiatief van Marie de Jager pragtige voorskote aan die Tehuis oorhandig.
Nog twee staatmakers is Hennie en Alletta Löchner wat onbaatsugtige werk in die Tehuis se tuine verrig. Natuurlik onthou almal die jarelange “slaaf” van die Tehuis, Suster Linda Meyer, voormalige bestuurder, maar tans ‘n inwoner. Die Bestuur en Beheerraad het ook nie van hulle verpleegpersoneel op Internasionale Verpleegstersdag vergeet nie. ‘n Interessante besoeker het op 18 Mei 2016 ‘n draai kom maak. Sy is Elmarie Haniball wie se pa, Giepie van Rensburg, die Tehuis in 1973 voltooi het. John het ook ‘n ou koerantberig (onbekend) van 1972 gestuur, waarin vermeld word van goedkeuring wat verleen is om die Tehuis te bou. “Ons het etlike navrae oor die verkoop van volwasse doeke ontvang van mense wat selfs na Hermanus daarvoor moet ry,” sê John. “Ons verkoop wel die doeke hier en het ook toerusting soos rolstoele en krukke wat gehuur kan word.”
Vir verdere navrae rakende die Tehuis, kan John van Rooyen by 028-394-0501 geskakel word.
Hardus Botha
