“Die see was gunstig vir visvang verlede naweek en die hengelaars is teen 07:00 die oggend uit, met lyne-op teen 16:00 en die weegskaal aan die werk teen 15:00,” sê Riaan van Staden van Overberg Boothengelklub.
“Vyf bote het ingeskryf met ‘n totaal van twintig hengelaars en sewe spesies is gevang met sewentien visse wat ingeweeg is.” Riaan sê al die hengelaars was nie so gelukkig om te kon inweeg nie. Net elf hengelaars kon punte vir die dag se harde werk kry. Die Top Boot vir die dag was Waypoint 1 met skipper Wayne Middleton, wat gevolg is deur King Fisher, Dad’s Toy, Sophi en Top Fin. Die Top Hengelaar vir die dag was J. Luff met ‘n totaal van drie spesies en vier visse wat hy ingeweeg het, gevolg deur Wayne Middleton (2de) en DP Burger (3de). Die mooi visse vir die dag was twee groot Rooi Romans van 2.34kg en 2.44kg, asook ‘n pragtige Geelbek van 4.04kg.
Terug by die klub is almal met ‘n ietsie vir die keel of ‘n lekker beker warm sop bederf om daardie hol kolle vol te maak. “Baie dankie aan alle deelnemers vir ‘n lekker dag en ons sien uit na ‘n gesellige kuier Vrydagaand met ons Pirate Party.”
Vir navrae kan Riaan van Staden by 082-929-8688 gekontak word.
