“Iemand het eendag gesê liefde en harmonie tussen Christene is eintlik ‘n stukkie hemel op aarde,” het ds Dirk van Dyk tydens ‘n gesamentlike Nagmaaldiens by die VGK-gemeente in Blompark gesê. “Die bediening van die Heilige Nagmaal is soos ‘n ‘voorgereg’ tydens ‘n ete en die hoofdoel met vandag se gesamentlike Nagmaaldiens is om eenheid tussen gelowiges oor grense heen te bevorder.”
Ds van Dyk het sy boodskap op Eff 2 baseer, met die klem op Eff 2:19.
“Julle is dus nie meer ver van God af nie, nie bywoners nie, maar mede-burgers van die gelowiges en lede van die huisgesin van God.” Hy het ook na die spreekwoord: “Jy kan jou vriende kies, maar nie jou familie nie,” verwys, bedoelende dat eenheid tussen gelowiges ‘n “outomatiese” resultaat behoort te wees, ongeag verskillende denominasies. “Die begrip ‘broer/suster’ waarna Paulus verwys, beteken eintlik dat gelowiges nóg nader as naasteliefde aan mekaar moet wees,” het hy gesê.
Die VGK-kerkgebou was stampvol en die kore wat opgetree het, het verdere luister aan die gewyde atmosfeer verleen: Die kore was Gansbaai NGK-koor, VGK-kerkkoor en die Visser-susters.
