Portretfoto’s behaal goud by Fotografieklub

Na aanleiding van Robert Johnson se onlangse opleidingsessie oor portretfoto’s, het die enkele beoordelaar behoorlik kopgekrap tydens verlede week se kompetisie.  Gansbaai Fotografieklublede is streng beoordeel, maar tog is ‘n paar goue toekennings gemaak.

Daar was twee kategorieë – die afdeling vir portretfoto’s en ‘n ope-afdeling.

Ook in die ope-afdeling is enkele foto’s met goud beloon.

Oor die algemeen is baie goeie foto’s in altwee kategorieë vertoon en die besprekings wat telkens gevolg het, was insiggewend en is leersaam deur die klublede gevind.

In altwee gevalle is heelparty foto’s van diere en voëls vertoon, met ook etlike kinders of bejaarde persone.

Robert het onder andere gesê dit is ‘n fout om portretfoto’s net as “kop-en-skouers” te sien. Dit kan ‘n groot verskeidenheid van foto’s wees, ook van diere, maar onder bepaalde voorwaardes, waarvan die belangrikste is om op die oë te fokus.

Die meegaande twee foto’s toon die uiteenlopendheid van portretfoto’s aan, wat demonstreer dat ‘n portretfoto nie noodwendig “kop-en-skouers” moet wees nie. Te oordeel aan die goeie foto’s wat as “tuisoefeninge” geneem is, het klublede groot baat by Robert se aanbieding gevind.

Gansbaai Fotografieklub se byeenkomste is vir elke eerste en derde Maandag om 18:30 van elke maand geskeduleer en vind te Groeneweide Kwekery plaas. Die volgende byeenkoms sal  Maandag, 18 Julie plaasvind, met opleiding in kleurtegnieke.  

Navrae kan aan Riaan Jacobs by 082-373-8270 (chairperson@gbpc.co.za) gerig word, of skakel vir Veronica du Plessis by 084-826-8781 (secretary@gbpc.co.za). Die klub se webtuiste is www.gbpc.co.za. 

Piet Visagie se foto, “Ou Man”, wat met goud beloon is.
Riaan Jacobs is ook met goud beloon  vir sy “Ou Man en Hond”.
Gansbaai_Courant