Scattered Links skarrel vir goeie werk

Gansbaai se motorfietsryers van die Scattered Links, Overberg Chapter skarrel weer ernstig rond vir hulle 2016 Overberg Rally.

Die “geskarrel” is egter op ‘n deeglike georganiseerde basis - hulle mág maar liefdadigheids“rally’s” reël.

“Ons reël jaarliks fondsinsamelingsgeleenthede vir liefdadigheid sedert ons stigting in 2006/2012,” vertel Junita Maree van die klub. “Vanjaar is egter die tweede groot rally wat gereël word, naamlik die Overberg Rally.” Hulle verwag baie motorfietsryers by Hazelvlakte, Bredasdorp gedurende die naweek van 30 September tot 2 Oktober 2016. Die kamp gaan vele pret oplewer met lewendige musiekoptredes, speletjies speel, geluktrekkings, kosstalletjies en veel meer, met talle pryse wat gewen kan word.

Vanjaar se rallynaweek is ten bate van Calvin Olivier. Hierdie jongman se lewe is vroeër vanjaar tydens ‘n ernstige motorongeluk binne sekondes verander. Die doel van hierdie fondsinsameling is om Calvin met sy enorme mediese onkostes by te staan.

Op 14 Augustus vanjaar bied die klub hulle derde Overberg “Breakfast Run” vanaf Botrivier na Gansbaai aan, ook ten bate van Calvin Olivier.

Vorige liefdadigheidsprojekte sluit onder andere die volgende in: Silwerjare Dienssentrum, Little Mason, Gideon's, Elim Huis, Bredasdorp, Kobus du Toit, Overberg Medical Response, His Blood Warriors, Adéle Roodt en Gansbaai Helpende Hande.

Vir algemene navrae rakende die Scattered Links, Overberg Chapter kan die President, Pieter Maree by 083-292-0190 geskakel word, of stuur ‘n e-pos aan hom by scatteredlinks.overberg@gmail.com.

Vir navrae rakende liefdadigheidsprojekte kan Junita Maree by 083-665-5341 geskakel word, of stuur ‘n e-pos aan haar by junitamaree95@gmail.com.

Gansbaai Helpende Hande baat groot by Gansbaai se motorfietsryers.
Gansbaai se omgee-motorfietsryers tydens ‘n oorhandiging aan Gansbaai Elim Huis.
Gansbaai_Courant