Gansbaai Biblioteek beplan ‘n opwindende aksie vir biblioteekdienste, maar maak staat op die samewerking van Gansbaai se leserspubliek. Die stigting van ‘n klub, “Vriende van die Biblioteek”, word beplan en die biblioteekpersoneel versoek biblioteeklede, asook die publiek, om saam op hierdie opwindende wa te klim. “Soos ons almal weet, is boeke vandag baie duur en dit duur soms net te lank vir Topverkopers vanaf Provinsiale Biblioteekdienste om hier aan te kom,” sê Sharman Geldenhuys, Bibliotekaris van Gansbaai Biblioteek. Sharman sê die Biblioteekstelsel bied 'n opsie om 'n Komitee saam te stel - bekend as “Vriende van die Biblioteek”. Hierdie komitee sal uit ‘n voorsitter, visie-voorsitter, sekretaris en tesourier bestaan.
Die hoofdoel van die komitee is om fondse op kreatiewe maniere te genereer om dan nuwe voorraad vir die Biblioteek aan te koop. Die Biblioteek ontvang ook gereeld boeke as donasies wat nie in voorraad opgeneem kan word nie; hierdie boeke kan dan verkoop word om fondse te genereer vir die aankoop van nuwe boeke.
Die eerste GROOT boekuitverkoping gaan Vrydag, 30 September 2016 op die Biblioteek se voorstoep plaasvind en alle gelde wat op daardie dag gemaak word, sal aangewend word om die "Vriende van die Biblioteek" te stig. Belangstellendes kan vir Sharman Geldenhuys of Edna van der Linde by 028-384-8346 skakel, of stuur ‘n e-pos aan sgeldenhuys@overstrand.gov.za.
