‘n Kleinbaai-afgetredene, wat nie sy naam bekend wil maak nie, het verlede Donderdag, 8 Desember 2016, by die hawe gaan stap en onwetend midde in ‘n “perlemoen-arrestasie” beland.
‘n Ander man, in privaatdrag, het hom aangesê om pad te gee, want “hy is op die verkeerde tyd op die verkeerde plek”.
Die Kleinbaai-man het opgemerk dat daar mense wat soos sardientjies ingeryg is, met hul gesigte na onder op ’n boot se boeg lê. Hy het ook ‘n rubberboot opgemerk met ‘n enjin wat flenters geskiet is.
Hy het besef dat hy moet padgee toe hy twee mans met haelgewere opmerk en hulle as beamptes van See-visserye herken het.
‘n Onbekende vrou het aangestap gekom en ‘n opmerking gemaak: “Die vark is ook tussen hulle”.
‘n Regeringsbakkie het nadergetrek om die vermeende stropers op te laai. Die Kleinbaai-man vertel dat een van hulle definitief gewond was.
Arrestasies
Die plaaslike SAPD media-beampte het intussen bekend gemaak dat agt mans op 8 Desember 2016 om 10:30 naby Dyer-eiland gearresteer is.
Hulle is vir “duik in ‘n ongemagtigde area”, asook “in besit van ongemagtigde toerusting” gearresteer.
Beamptes van Seevisserye het drie rubberbote in die omgewing van Dyer-eiland opgemerk en probeer aankeer.
‘n Jaagtog op see het ontstaan, terwyl gesien is hoe sakke met vermoedelik perlemoen daarin in die see gegooi word.
Die beamptes het daarin geslaag om een boot aan te keer.
Agt vermeende perlemoenstropers is in hegtenis geneem.
Die tweede boot kon nie opgespoor word nie en die derde een is verlate by Buffeljachts gekry.
Daar is op beide bote beslag gelê en dit word op die oomblik by Gansbaai SAPD gestoor.
Die agt aangeklaagdes het Maandag, 12 Desember 2016 in die hof op Bredasdorp verskyn.
‘n Klag van poging tot moord is intussen by die Hermanus SAPD teen ‘n regeringsbeampte gelê.
Die saak word ondersoek.
prev
next
