Daar heers groot opgewondenheid by Strandlopertjie Bewaarskool in Blompark. Die sowat 30 kleutertjies gaan eersdaags op die kykNET NOU!-program, Kleuterzone verskyn.
Die opname is vir Donderdag 9 Februarie 2017 geskeduleer en Gansbaaiers staan almal ‘n kans om as gehoor, deel te wees van die verfilming.
Daar is egter een reuse probleem – die skooltjie in Blompark se Dahliastraat het nie ‘n naambord nie en die skooltjie moet dringend een kry voordat die TV-span arriveer!
Ons gesels met Priscilla Cronjé, hoof by die bewaarskool. Sy vertel dat sy laat verlede jaar op ‘n Facebook-bladplasing gereageer het. Al wat sy moes doen is om van die blad te hou, sodat haar skooltjie ‘n kans staan om verfilm te word vir ‘n TV-program.
Haar foon se posboodskapfunksie was egter foutief en sy was nie eers daarvan bewus dat Strandlopertjie gekies is vir die program nie.
Toe iemand haar die 14de Desember daarmee help, sien sy dat die ABS Produksie-huis haar reeds die 6de Desember laat weet het dat haar skool kwalifiseer.
Sy het dadelik van haar laat hoor, maar hulle het gesê dat hulle programskedule reeds vol was. Hulle sou nogtans kyk wat hulle kon doen.
Nie lank daarna nie, is Priscilla in kennis gestel dat haar bewaarskool op die skedule aangebring is en dat die opname Donderdag, 9 Februarie 2017 in Blompark sal plaasvind.
Die skool bestaan slegs uit twee klassies – die Dolfyne en die Walvisse – en hulle is hard besig om te oefen vir die produksie.
Priscilla is so tussendeur besig om briewe na die sakegemeenskap uit te stuur met die hoop om fondse te in vir ‘n naambord.
Enigiemand wat haar van hulp kan wees kan haar skakel by 083 745 4899.
As u graag deel van die opnamegehoor wil wees, kan u dieselfde nommer skakel.
Die opname begin Donderdag, 9 Februarie om 18:00 in Gansbaai Primêr se skoolsaal en kaartjies is vooraf teen R80 vir volwassenes en R40 vir skoliere beskikbaar by Priscilla. Sitplekke is beperk.
