Kerkorrel-vreugde ná 5 maande
Spreekwoordelike vreugdesvure het gedurende die naweek van 13-14 Augustus 2022 gebrand - Pikkie Louw (orrelis) kon weer agter die NG-gemeente se kerkorrel inskuif en die kerk met luisterryke orrelklanke vul.
Die herstel van die orrel is voorafgegaan met baie beplanning en finansiële keuses wat gemaak moes word - iewers moes R100 000+ vandaan gekry word. Verskeie opsies is oorweeg, maar die oorgrote stemme het by die herstel van die orrel ‘vasgesteek’. Die koorlede, onder leiding van Aletta Löchner, het saamgestaan, verskeie bedieningsaksies, gemeentelede, die gemeenskap van Groter Gansbaai en selfs vanaf elders, het almal betrokke geraak en, siedaar, Sondag, 14 Augustus 2022 is die orrel ‘ingewy’ - binne die bestek van letterlik enkele dae is meer as die herstelkoste van R100 000+ ingesamel - knapgedaan, knapgedaan!
Met Aletta Löchner en haar eggenoot, Hennie se puik organisering en harde werk saam met almal wat behulpsaam was, is die enorme bedrag slegs met drie pogings ingesamel: ‘n lootjielys, ‘n prestige aandete in die Pretoriussaal en ‘n veiling na die ete, asook skenkings en donasies.
Die uitstekende ete het uit ses soorte potjies bestaan: skaap, wildsvleis, beesstert, afval, hoender en kerrie-maalvleis, met ‘n keuse tussen kaboemielies of rys en ‘n lekker agterna-soetigheid. Jannie Botha het as die gladde-mond-afslaer homself uitstekend van sy taak gekwyt - praat van vinnig praat, mens! Duursame en pragtige skenkings is ontvang wat opgeveil kon word. Die wenner van die lootjielys was Annette le Roux - twee aande vir ‘n gesin by Goedereede Gastehuis buite Robertson.
Wat die ete-geleentheid besonders gemaak het, was Danie Niehaus se gratis optrede - dié gewilde Afrikaanse sanger mag maar sing, dis nie altemit nie. Niemand kan kla oor die aantal liedere wat hy gesing het nie - gratis en verniet! “Ai-man, dankie Danie, lekker gewees!” Hy is ook gevra om by die lootjietrekking onder leiding van Hugo Carstens, betrokke te wees. Spesiale bedankings: Danie Niehaus, potjiekosse, skenkers, donateurs, harde werkers en baie meer - sonder ‘n ieder en ‘n elk sou hierdie projek nie met groot sukses afgesluit kon word nie.
Sondag, 14 Augustus 2022 het die ‘Groot Dag’ aangebreek. Pikkie Louw was weer ‘tuis’ agter die orrel in plaas van die klavier. Ds Hanri Joubert het die diens in ‘n volgepakte kerkgebou gelei, met Psalm 145 as teksgedeelte. Die kerkkoor, onder leiding van Aletta Löchner en Pikkie met orrelbegeleiding, het vir pragtige koorsang, asook vir gemeentesang gesorg. Laerskool Gansbaai se Senior en Junior kore onder leiding en begeleiding van Carla du Toit en Asanti Smit, het pragtig tot die oggend se verrigting bygedra - met spontane applous wat hulle ontvang het.
Pikkie! Pikkie! Jou afsluitingsuitvoering op die kerkorrel het met die louere weggestap, jy mág maar en ons waardeer jou Godgegewe talente: Mozart: ‘Alleluia’ from ‘Exsultate, jubilate’.
Hardus Botha
