Lydenstyd: Kyk om jou
“God kom na ons toe vermom as ons lewe”. Willem Nicol skryf so in sy boek “Oop vir die oomblik”. Hy bedoel dat as ons meer “attentive” lewe, met meer verwondering ons God in alles en in almal sal kan raaksien. Nicol skryf: “Die geheel van wat nou hier is, in hierdie oomblik, is meer as wat jy ooit kan saamvat, want God is hier. Hy is die dieptedimensie van hierdie nou, Hy wat alles deurtrek en alles omraam”. Kom ons maak dit meer prakties. Hoe leer ek om met aandag te lewe (“attentiveness”)? Deur klein gewoontes, miskien klink dit silly, maar dit werk. Kies elke dag ‘n kleur en wees aandagtig op daardie kleur. Kies vandag bv. geel en kyk waar en wanneer jy geel raaksien (besef ruimte so groot soos jou huis!). Dit is speletjie, maar ook ‘n inoefening in “sien” en “kyk”. As ek nie eers meer kleure raaksien nie, hoe gaan ek Christus in iemand raaksien? Hoe gaan ek vir God dan opsoek in die alledaagsheid? Kom ons leer net ‘n slag om net weer bloot raak te sien.