Birkenhead Boothengelklub: ‘Steaks’ wat smelt in die mond

Birkenhead Boothengelklub: ‘Steaks’ wat smelt in die mond

Maandelikse boothengeldae is elke maand ‘n hoogtepunt vir die hengelaars van die Birkenhead Boothengelklub - maar as daar nie see toe gegaan kon word nie, word die maandeindfunksie beslis nie afgelas nie! Wie het dan nou mooi weer nodig om gesellig saam te kuier en te dans?

Die onlangse bootklubfunksie het, soos gewoonlik, gesellig afgeloop, met De Wet Gilliomee en Steve Muller wat ‘yslike steaks’ gebraai het wat behoorlik in die mond ‘gesmelt’ het. Staatmaker Elize Burger, wat saam met De Wet die klub se spyseriering behartig, het net so hard gesorg vir die heerlike bykomende disse.

In die agtergrond was Jan Lourens weer op sy stukke met sy Musiekfabriek vir voete-jeuk musiek tot laataand toe. Hengelpryse vir die hengelaars wat die funksie bygewoon het, is deur voorsitter Robbie Nelson oorhandig. Die gelukkige kaartjienommers wat getrek is, het ‘n bottel wyn aan drie eienaars besorg: Francelle Steyn, Colleen Kemm en Anita Botha. Daarna is daar net geëet, gekuier, gesels en gedans tot laataand toe.

Hardus Botha