Liezl Prinsloo se uitdienstrede na 31 jaar in haarbedryf
“Na 31 fantastiese jare in die haarbedryf, is ek hartseer om aan te kondig dat ek die moeilike besluit geneem het om, as gevolg van my gesondheid, as haarstilis af te tree,” lui Liezl Prinsloo (50) van Hair Haven se groete-boodskap op Facebook aan haar kliënte. “Dis eintlik na 'n leeftyd en al 31 jaar was in Gansbaai,” het Liezl Gans-Berg Nuus meegedeel. “En ek wil elkeen van my kliënte bedank vir die vertroue, lojaliteit en ondersteuning wat julle oor die jare aan my getoon het - dit was 'n voorreg om deel van julle lewens te kon wees en julle te help om op julle beste te lyk en te voel.”
Liezl is op 30 November 1974 in Worcester gebore, maar het in Montaqu grootgeword. Vir haar hoërskool-onderrig was sy by Hermanus Hoërskool. Sy voltooi haar studies as haarstilis aan die einde van November 1994 aan die destydse Tygerberg Kollege in die Kaap. Direk daarna begin sy by haar ma, Marie Marmetschke, se haarsalon, Salon Marze, werk. “Riaan het eendag by die salon ingestap gekom en hom aan my voorgestel en net daar vir hom gesê om vir my te kom kuier,” vertel Liezl. “Ek het baie verleë gevoel, maar-nou-ja, Riaan was toe wel my toekomstige man!” Ds NJ van As het hulle op 26 Oktober 1996 in die NG-Kerk Gansbaai in die huwelik bevestig. Twee kinders is uit die huwelik gebore: 'n seun, Shaun (23) en 'n dogter, Tineke (19).
“Sowat 5 jaar later het my ma afgetree en ek het die salon by haar oorgeneem, maar 'n paar jaar later aan Aljoma du Toit verkoop,” het Liezl oor die res van haar loopbaan as haarstilis begin gesels. Daarna is sy na Junita by Visions Hair in die ou Sea View gebou, maar het later 'n plekkie by Rosemary gehuur, waar sy en Tracy Gibson begin werk het. “Ons kliënte het te veel begin raak en ons het na 'n ander perseel in Fabriekstraat verhuis en Hair Tizelle Salon geopen. Die salon het sy later aan Lisie verkoop en vir nog 6 jaar daar gewerk. In November 2023 is Liezl na Hair Haven in Hoofstraat, waar sy tot en met haar aftrede gewerk het.
“My kliënte het geen rede tot kommer omdat ek weg is nie,” het sy gesê. “My wonderlike kollegas, Tracy (076 335 1369) en Isabel (072 483 5469), sal met graagte na al hulle haarbehoeftes omsien!” Wat van toekomsplanne? “As gevolg van my gesondeheid gaan ek hoofsaaklik rus, lekker kos kook en beskuit bak omdat ek nooit tyd daarvoor gehad het nie,” het Liezl die gesprek met die Gans-Berg Nuus afgesluit. “Ek is ook lief vir naaldwerk en hoop ek kan by die Kersmark inkom en daarna moontlk ook by kleiner markies.” Soveel jare in dieselfde beroep in dieselfde dorp - Gans-Berg Nuus se Redaksie wens Liezl net die beste vir haar gesondheid en “pensioenjare” toe!
Hardus Botha
prev
next
