Martin Lourens van Du Toitstraat 36, Franskraal het ‘n besonderse versameling van 400 Ferrari-modelle.
Die Ferrari’s is in jaartalle in drie vertoonkaste uitgestal en strek vanaf 1947 toe die eerste voertuie uit die fabriek bekendgestel en geproduseer is. Lourens wat al die afgelope 20 jaar sy huis in Franskraal besit woon die afgelope 2 jaar voltyds daar. Die versamel-gogga het hom 27 jaar gelede gebyt en hy het ‘n goeie vriend, Charl Saayman in Riebeeck Kasteel, wat self ook 300 van die modelkarretjies het. “Ons kinders stel nie in ons versamelings belang nie en ons het ooreengekom dat die langslewende van ons die ander een se versameling sal erf,” vertel Lourens.
Hulle was in September saam na die Ferrari-fabriek by Maranello in Italië waar hul albei die geleentheid gekry het om self een te bestuur. Lourens was een maal tevore ook daar toe hy in 1996 die San Merino Grand Prix by Imola bygewoon het. Die versamelaarskaal is 1:43 en hy spog met alle Formule 1 renmotors wat tot dusver gebou is.
“Ek sal graag nog versamelaars wil ontmoet en almal is welkom om na my Ferrari-versameling en –biblioteek te kom kyk.” Lourens kan by 028 388 0851 of 084 047 4327 geskakel word.
Francois de Jongh
