Kwilters se Liefdadigheidswerk

"Dit is algemene beleid onder Kwilt-groepe om minstens een liefdadigheidsprojek per jaar aan te pak," vertel Kinnie Schutte, leidster van die Gansbaai Kwiltgroep.

Hierdie aktiewe groepe dames vergader gereeld om te leer en te verbeter, terwyl daar trots aan hul kwiltwerke gewerk word, maar ook om gesellig saam te verkeer.
Die drie groepe in die omgewing is die Gansbaai Kwiltgroep, met Kinnie Schutte (028-384-3111) as groepleid-ster; Pearly Beach se Pearly Patches, met Anne Steyn (028-381-9004) as leidster; De Kelders se Wacky Whalers, met Rika Hoffman (028-384-1697) as leidster.
Vir enige navrae kan belangstellendes enige van hierdie drie dames skakel. Kinnie sê deel van die Gansbaai-groep se liefdadigheidsprojek is om ‘n Vrydag by die Woekermark te help met die teeskinkery. Rika sê die Wacky Whalers se 2013 Liefdadigheidsprojek is nog in beplanning.
|
Die Pearly Patches van Anne se 2013 Liefdadigheidsprojek is op BARC gevestig. Hulle beplan om 'n groot kwiltwerk vir oorhandiging aan BARC te finaliseer, wat dan as 'n fondsinsame-lingsprojek uitgeloot kan word. Behalwe vir afsonderlike byeenkomste, vergader hierdie drie groepe vier keer per jaar om gesellig met hulle onderskeie kwiltwerke saam te kuier. Hierdie byeenkomste staan onderling as "Show & Tell"-byeenkomste (Wys en Vertel) bekend.

Dan is daar geleentheid vir die dames om na mekaar se kwiltwerke te kyk, dit te bespreek en om wenke uit te ruil, asook om 'n aangename onderlinge gees van samesyn op te bou.        
Hardus Botha