Overstrand Medical Response se personeel, met vlnr Steven Breytenbach, Abrie van Wyk, Cassie Carstens, Chantell Buys en Riaan Buys. Foto: Alma Breytenbach
Gansbaai en omgewing het sonder twyfel goeie rede om tevrede te wees met genoegsame mediese dienste wat beskikbaar is. Ingesluit daarby is die ambulans van Overstrand Medical Response van Riaan Buys en Cassie Carstens. "Ons is tot almal se beskikking, ongeag pasiënte se persoonlike keuses van spreekkamers," sê Riaan. Hulle bekwaamheid en mediese bystand wat ten tye van krisisse en ongelukke verleen word, is al deeglik bewys.
Overstrand Medical Response het in 2009 tot stand gekom en hulle eerste optrede met 'n wakende "mediese-oog" was tydens 2009 se Fees van die Ganse. Sedertdien het positiewe groei plaasgevind en in Januarie 2010 het die ambulans, 'n ware aanwins vir Gansbaai, bygekom. 'n Verdere voordeel van hulle bedrywighede is onder andere etlike Noodhulpkursusse wat al deur hulle aangebied is, vanaf Vlak 1 tot Vlak 3, asook hulle teenwoordigheid tydens sport- en ander byeenkomste. "Ons sorg ook dat ons by die aanstelling van nuwe personeel slegs van plaaslike mense gebruik maak," sê Riaan. Voorbeelde hiervan is Riaan se dogter, Chantell Buys, Steven Breytenbach van Pearly Beach en 'n 2012 Gansbaai Academia matrikulant, Abrie van Wyk, wat tans 'n student is met die oog op ambulansdienste en wie as vrywilliger by hulle werk. Hulle dienste is beskikbaar vir Gansbaai en omgewing, Pearly Beach, Baardskeerdersbos, Stanford en die plaasge-meenskappe. Die gedugte span bestaan tans uit Cassie Carstens en Riaan Buys, Chantell Buys, Steven Breytenbach en Abrie van Wyk. "Ons is dankbaar teenoor Gansbaai se verskillende spreekkamers vir uitstekende samewerking en ondersteuning van veral ons ambulansdienste," sê Riaan. Hy het ook sy waardering teenoor die onderskeie dokters vir hul samewerking uitgespreek. Goeie samewerking tussen Overstrand Medical Response met die verkeersmanne, brandweer en SAPD is ook aan die orde van die dag.
Vir flink ambulansdiens kan 078-699-6995 geskakel word, terwyl Cassie by 078-699-6995 en Riaan by 083-881-3631 vir noodgevalle geskakel kan word. Navrae kan ook aan hulle by overstrandmedics@gmail.com ge-epos word.
Hardus Botha
