Wel, ons kan nie te veel te kla nie. Daar is galjoen en kabeljou gevang en van Gansbaaihawe af ‘n “skipjack” Die groot nuus is natuurlik die baie sardyn wat nou oral om ons is en daarmee gepaardgaande natuurlik die hoop op groter vis. Daar was wel van hierdie vis te bespeur in die hawe maar wou nie die hoek vat nie.
Of die groter vis tog gaan volg is ‘n ope vraag en wat dít gaan bepaal is die weer. Volgens die vooruitvoorspelling van die weer behoort daar nie veel wind te wees nie en gaan dit boonop swaai vanaf suidwes tot suidwes of wes. Dit alleen gaan ‘n groot invloed hê en sal ook die watertemperatuur (hopelik ten beste) verander. Onthou, dit nou alles, verlede week.
Sardynaas behoort nou weer vrylik beskikbaar te wees en sal hopelik ook nie meer so duur wees nie. Soos ek vantevore in hierdie rubriek uitgewys het is die toestand van jou aas baie belangrik. Verkieslik moet jou sardynaas skubloos wees, dis baie makliker om so ‘n aas aan die hoek te kry (ek praat nou natuurlik nie van die groter roofvisse nie, aangesien die manier van aan die hoek sit, verskil). Dan lyk dit ook asof die vis in elk geval ‘n ontskubte aas verkies. Dit is bekend dat sommige visse self hul aasvis ontskub voordat daar behoorlik vasgebyt word. Indien so ‘n aasvis eers kans gehad het om droog te word bemoeilik dit ook die situasie. Probeer tog die volgende en kyk of dit ook sal help, soos ek vroeër ondervind het. Ek het my aas, skubbe en al, in ‘n emmer met water gehad, waar dit moes ontvries. Ek het intussen twee silwervisse gevang en dié ook in die emmer geplaas. My vrees was dat hulle die aas kon pap karring aangesien ‘n silwervis baie lewendig kan wees. Groot was my verbasing en nog dankbaar ook om te vind die silwervis se gespartel het my visaas outomaties ontskub! Miskien werk hierdie storie nie altyd nie, maar ek gaan weer probeer.
Seemeeu
