Steynsbosch se stap

Daar moet darem tyd vir ontspan en 'n lafenissie afgestaan word, want wanneer die voetslaners voetslaan, doen hulle dit met mening.  Foto: Anita Botha

"Steynsbosch is die naam van die oorspronklike plaas wat behoue gebly het, maar wat sedert 2002 deel van Grootbos Natuurreservaat is," vertel Sean Privett. Sean sê die plaas is sowat 24 hektaar groot en die naam van die plaas kom oorspronklik van die ou melkhoutbos, Steynsbosch, waardeur die dapper stappers van Strand-Veld Voetslaanklub gestap het. "Die digte woud waardeur ons gestap het, was verruklik mooi, maar is ook met 'n hoë humiditeit gevul," vetrel Anita Botha, een van die stappers. Sy verwys ook na die wilde dagga en Maartlelies wat nou pragtig in blom is, asook pragtige witstinkhoutbome wat besigtig kon word. Maar dit was nie net bos en gelyk fynbosarea waar gestap is nie. Die berg op die plaas, bekend as die Pinnicle Peak, is ook uitgeklim, wat op sy eie 'n natuur-belewenis vir die stappers was. Staptogte word vir elke eerste Saterdag van elke maand gereël en die een roete is so natuurskoon soos die volgende een.
Belangstellendes in die op-en-wakker Strand-Veld Voetslaanklub kan vir Roelof Diener by 082-552-5444 skakel, of stuur 'n e-pos aan hom by roelofdiener1@gmail.com.

Hardus Botha