Sybill October, Die Bron Primêre Skool te Stanford se skoolhoof
By Die Bron Primêre Skool te Stanford verloop sake nogal bedrywig en dit is 'n behoorlike mondvol om met Afrikaans, Xhosa en Engels by te hou. Die skoolhoof, Sybill October, is egter 'n gesoute opvoeder met 'n leeftyd se ervaring in die onderwys en die taalaspek is geen probleem vir haar nie. Sy dien reeds sedert 1967 (64 jaar) by die skool as opvoeder en is in 1994 (19 jaar gelede) as skoolhoof aangestel.
"Ons is goed ingerig en georganiseerd en het geen aanpassings-probleme met die multi-kulturele onderrig nie," sê sy. Die skool beskik tans oor 15 opvoeders en 501 leerders.
Die Bron Primêre Skool se nuwe onderwyser, Maresa de Villiers, saam met haar Gr 2 leerders
Dan is daar 4 ondersteunen-de personeellede (admini-strasie, terrein en tuinier), 4 vrywilligers (voedingskema) en 3 assistente (Premier-projek, Afrikaans en Xhosa). Gr1-3 se Xhosa-leerders ontvang moedertaalonderrig, terwyl Gr 4-7 in Xhosa en Engels onderrig word, met Afrikaans vir die res van die leerders vanaf Gr R tot Gr 7. "Ondanks die vele taal- en kultuurverskille, is ons geseënd met wonderlike samewerking en 'n spontane onderlinge gees onder al die leerders," sê Sybill. Nichol Dreyer, voorheen van Gansbaai Primêr, is die enigste haan onder die henne en is as Departementshoof aangestel. Hy neem ook volle verantwoordelikheid van alle sportaktiwiteite.
Die skool het onlangs 'n nuwe en entoesiastiese opvoeder bygekry. Maresa de Villiers was aan Laerskool Theo Wassenaar in Gauteng verbonde en is met ingang van 1 April by Die Bron Primêre Skool vir die Gr 2 leerders aangestel. "Eintlik het ek teruggekom huis toe, aangesien ek in hierdie omgewing grootgeword het," vertel Maresa.
Sybill vertel dat die leerders en opvoeders onlangs met groot hartseer van een van hulle Gr 5 leerders, Lusisipho Sikoyela (12), afskeid geneem het wat onverwags oorlede is. "Sy was 'n skrander, aktiewe en hulpvaardige dogter wat op sport- en akademiese gebied uitgeblink het," vertel Sybill.
Wyle Lusisipho Sikoyela, van wie Die Bron Primêre Skool se leerders en opvoeers hartseer afskeid geneem het
Lusisipho was 'n kranige atleet, hokkie-, netbal- en sokkerspeler en het ook in Eisteddfod-geledere met haar Xhosa-gedigte uitgeblink.
Hardus Botha
