Groot Derby Saterdag

Black Leaves vs Hawston

Die lang verwagte droom dat daar minstens twee spanne uit die Overstrand aan die groot Premier Liga moet deelneem het toe uiteindelik waar geword. Die tans seëvierende Hawston sak dan juis toe hier op die erg gekweste Gansbaaiers. Sedert die wedstryd vroeër (04 Mei) teen Villagers Worcester, tot nou 18 Mei, behoort Black Leaves genoegsaam herstel het van al die wonde. Ja, Black Leaves en sy bestuurspan sal slaggereed wees vir Hawston se ontvangs. Almal weet tot watter hoogtes "Derby's" mekaar kan aanspoor. Vir die Gansbaaispan sal dit noodsaaklik wees om na hul vierde probeerslag op die punteleer te kom en as ware oorwinnaars uit die stryd te tree. Die Gansbaaiers het die afgelope tyd glad nie te waffers vertoon nie, maar beloof om na alle verwagtinge 'n veel sterker A-span in die veld te stoot. 

Hawston sal kom met 'n felle aanslag op die baai met sy geroemde agterlyn. Met die ter perse gaan was daar nog nie 'n aangeduide 22 tal  nie. Glo maar gerus die afrigter, Marcel Seconna, het sy troepe reg. Black Leaves se 3de en 2de spanne behoort ook gedetermineerd te wees vir welslae. Vinger word maklik gewys as dinge nie reg gaan nie, maar dit is nou eerder die tyd om saam te staan. Roofkykers, julle uitsigte gaan in die toekoms belemmer word. Dit kos glo nou R10-00 by die hek vir lekker sports.  

So sê Bra “G”