Rugbyspelers van die Laerskool Gansbaai was verlede week bevoorreg om van 'n gesoute internasionale beroepspeler meer van die spel te leer. Rohan Kitshoff (heel links), flank van die Stormers en die WP, het by familie op Gansbaai kom kuier en een middag die skool besoek om die seuns toe te spreek en 'n bietjie afrigting te doen. Rohan het Namibië in die Wêreldbekertoernooi van 2011 verteenwoordig en speel binnekort weer vir dié land wanneer hulle in Senegal gaan probeer kwalifiseer vir die volgende saamtrek in 2015. Hy is ook lid van 'n Franse klubspan.
Rohan, bekend as 'n baljagter van formaat, het die seuns aangemoedig om hul drome uit te leef. Hy het vertel hoe hy as kind graag eendag 'n goeie rugbyspeler wou word wat saam met beroemdes voor 50 000 toeskouers op Nuweland uitdraf. Mense het gesê hy is te klein om groot rugby te speel, maar met geloof en harde werk het hy sy droom verwesenlik -- en selfs vir sy geboorteland teen die Springbokke gespeel! Ná die praatjie het hy die o.13-span op die oefenveld gaan help terwyl die jonger spelers en 'n klompie ouers en onderwysers belangstellend toegekyk het.
Gerrit Cloete
