Vlnr is Stella Swart en Margi Muller in aksie tydens die Lyndanskonsert wat deur Margi gereël is
‘n Gesellige Lyndanskonsert ter stywing van die Birkenhead Boothengelklub se fondse is verlede Saterdag deur Margi Muller van die klub gereël.
Die oggend het baie gesellig verloop en die groot groep rose (en doring!) het die byeenkoms terdeë geniet. Margi, Stella Swart en Petro Scholtz is die drie dames wat vir etlike lewendige lyndansvertonings gesorg het…gepaardgaande met goeie applous. Margi het egter gesorg dat dit nie ‘n “besigtigingskonsert” is nie en direk ná hulle vertonings is almal teenwoordig by die lyndanse betrek, wat sommer vir groot pret en lag gesorg het.
Daar is behoorlik ge-lyndans, ge-“can-can”, ge-rieldans en selfs ge-paaldans, tot groot vermaaak vir almal.
Van die bekende liedjies wat as begeleiding van hierdie gesellige dansery gedien het, is onder andere Loslappie, Hello Dolly, Achy Breaky Heart, Tennessee Waltz en die Macarena can-can. Margi het ook gesorg vir geskenkpakkies vir verjaarsdae, kaartjie-nommers, beste paal-dansers en al haar gewillige helpers om ‘n sukses van die dag te kon maak. By die netjiese versierde tafels is niemand afgeskeep nie en daar was meer as genoeg te drinke en te ete.
“Ek bedank graag almal vir hulle teenwoordigheid en deelname, asook die dames wat eetbordjies saamgebring het, maar ‘n spesiale dankie aan Petro Scholtz, Stella Swart, Maureen Taljaard en Tollie Thompson vir hulle hulp en ondersteuning,” het Margi gesê.
“Vir die wat belangstel in soortgelyke fondsinsamelings-lyndanskonserte, kontak my gerus!” Margi Muller kan by 082-921-3129 gekontak word, of stuur ‘n e-pos aan haar by accsol4u@telkomsa.net.
Hardus Botha
Deelnemers in aksie tydens ‘n gesellige Lyndanskonsert in die Birkenhead Boothengelklub se saal
