Sirkels: Anton Goosen se Nuwe Album en Vertonings
Sirkels bevat nege nuwe liedjies, insluitend drie toonsettings ‘Bly by my’, my lief enen ‘Êrens is jy’ van Antjie Krog, asook Apollo 11 (Rumtestasie Houston) van DJ Opperman. (Sien berig in hierdie uitgawe: Kultuurguru’s deurvleg met Kroonstad se kaalvoetkinders) Dit sluit ook twee duette, met onderskeidelik Lise Swart en Zolani Mahola in.
Die eerste enkelsnit vanaf die album, Bly by my, my lief, wat hy vir die Woordfees getoonset het, is sedert dit in Mei uitgereik is, baie goed deur radiostasies, resensente en luisteraars ontvang. Anton se eerste album, Boy van die Suburbs, was in 1979 ‘n kitssukses
Anton is ‘n lewende legende, algemeen beskou as die vader van Afrikaanse rock, het al meer as 20 albums uitgereik en die musiek vir verskeie films geskryf, insluitend ‘n Brief vir Simone (1980), Die laaste Tango (2013) en Siembamba (2017). Hy het ook liedjies vir beroemde kunstenaars soos Sonja Herholdt, Laurika Rauch, Richard Clayderman, Carike Keuzenkamp en Koos Kombuis geskryf. In sy veertigste jaar in die musiekbedryf (2019), het hy die album 40 Jaar: Liedjieboer innie Langpad uitgereik.
Gedurende sy loopbaan is Anton met verskeie toekennings vereer, insluitend SAMA, Innibos en FAK, vir sy lewenslange bydrae tot musiek.
Buiten die uitreiking van Sirkels, werk Anton vanjaar aan verskeie konsertvertonings, asook ‘n vier-episode dokumentêr saam met filmvervaardiger, Niel van Deventer.
Sirkels is meesterlik saamgestel en bied ‘n lekkerluister-ervaring vir oud en jonk. Dit is beskikbaar op alle digitale stromingsplatforms. Gaan soek dit by: linktr.ee/antongoosenliedjieboer
Gansbaai Courant wou weet wanneer sy plaaslike gehoor eendag ‘n beurt kry om hom te sien optree en was verras om te hoor dat ‘n vertoning sommer om die draai is.
Hy en sy kitaarspeler, Illimar Neitz, met Valiant Swart as gaskunstenaar, tree op 1 en 2 Augustus by Laerskool Gansbaai op. Die twee kultuuraande met die oog op fondsinsameling vir die skool, word in samewerking met drie onderwyseresse, Estie (Anton se vrou), Asanti Smit en Alana Louw gereël.
