Gansbaai Jukskeiklub 4de Toeks Moore Opedag
Saterdag, 26 April 2025 kan as 'n enorme sukses vir die 4deToeks Moore Ope Jukskeidag beskou word - daar was nie minder nie as 17 spanne wat ingeskryf het nie - van heinde en verre! Gansbaai Jukskeiklub was die gasheer en spanne van Worcester, Groenberg, Danabaai, Oudsthoorn, Stilbaai, Mosselbaai, Westelike Provinsie, Strandkloof en, glo dit of nie, Franskraal Rolbalklub. Pieter Moore het die Gans-Berg Nuus meegedeel dat die klubbestuur dit as 'n groot voorreg beskou.
Die onderskeie spanne het in A-, B- en C-afdelings teen mekaar meegeding.
Wenners:
A1 - Voltallig; A2 - Astros; A3 - Jack & Jill.
B1 - Danabaai; B2 - Worcester; B3 - Franskraal Rolbalklub.
C1 - Lekkerbek; C2 - Danabaai; C3 - Oudsthoorn.
“Graag wil ons ons hoofborge vir hulle bydraes bedank: Campbell Fresh, Gansbaai Superspar, Sizisa Sand, Stone & Gravel, asook al ons ander borge,” het Pieter Moore gesê. “Dankie aan ons ou staatmaker, Dyer Eiland Visserye, wat ys vir die dag en die seisoen skenk. Ons dank ook aan ons Hemelse Vader vir 'n perfekte dag om ons sport te kon beoefen.”
Toeks Moore Opedag
Lesers mag dalk wonder oor die oorsprong van die jaarlikse Toeks Moore Opedag. Die Gans-Berg Nuus het bietjie navraag gedoen. Pieter Moore van die klub se eggenote, Toeks, is op 4 Julie 2021 oorlede. Sy was nie net aktief by die klub betrokke nie, maar was 'n voorslag Jukskeispeler: Junior-, WP-, Senior Sentraal-, Oos-Transvaal- en Overberg-Kleure. In 2016 verwerf Toeks ook haar SA Kleure. Sy het vir bykans 20 jaar (2002-2021) op die Gansbaai Bestuur gedien en in 2021 word die Overberg Sport Ererol Toekenning aan haar gemaak vir haar groot bydrae tot die Jukskei-sport.
Hardus Botha
