J&A Paneelkloppers kry nuwe eienaars
Die bekende J&A Paneelkloppers van Jan van Tonder in die Industriële gebied, wat op 20 Februarie 2024 oorlede is, het nuwe eienaars gekry - Caven (direkteur) en sy eggenote, Jennifer (mede-eienaar) Pietersen. Die egpaar het die besigheid op 1 Maart 2025 by Jan se eggenote, Marlene van Tonder, oorgekoop en het besluit om die naam onveranderd te behou.
Caven is 'n ou bekende in die besigheid en het baie jare vir Jan gewerk en later as bestuurder waargeneem as gevolg van Jan se gesondheid. Na Jan se afsterwe, het Caven die besigheid bestuur. Marlene het besluit om die besigheid te verkoop en Caven, met sy jarelange ondervinding, en Jennifer, was die ideale kopers.
Nadat die egpaar die besigheid op 1 Maart 2025 oorgeneem het, het Caven al die personeellede vervang en met 'n nuwe struktuur en strategie begin. Caven het hom in 1990, sowat 25 jaar gelede as 'Spray Painter' gekwalifiseer, nadat hy sy ambag by Worcester Bakwerke voltooi het. “Ek is eintlik al van skooldae af by paneelklopwerk betrokke,” vertel hy.
Die egpaar is 'ou' Gansbaaiers en is aan baie gemeenskapslede bekend. “Ek en Jennifer is nie net hier om paneelklopwerk aan Gansbaai en omgewing te bied nie,” het Caven gesê. “Ons wil ook in die gemeenskap met liefdadigheidswerk, soos onder andere om by skole met verversings of kospakkies tydens spesifieke geleenthede betrokke raak.” Hierdie entoesiastiese egpaar beplan om die sukses van J&A Paneelkloppers nog verder uit te brei. “Ons hernu onder andere ook meubels, yskaste en staalwerke wat geroes is,” het Jennifer gesê. “Ons streef daarna om net die beste diens en eindprodukte te lewer.”
Caven en Jennifer van J&A Paneelkloppers kan onderskeidelik by 072 244 8986 / 082 447 3839 gekontak word. Die kantoornommer is 028 007 0283, of stuur 'n epos aan japanelbeaters@gmail.com.
Hardus Botha
