Elna van Zyl tree af by Great White Junction...na 15 jaar
Elna van Zyl, 'n bekende gesig by die Great White Junction, het besluit om na sowat 15 jaar af te tree. Sy het die skoonmaakdienste-kontrak gehad en was, maar is steeds, die Tuinbestuurder. Sy het op 31 Julie 2025 die tuig neergelê - maar nie in geheel nie, haar aftrede is net op haar skoonmaakdienste van toepassing. “Ek het besluit om steeds met die Tuinkontrak wat ek met die Bestuur het, aan te gaan - dit is 'n werk wat ek baie geniet.”
Elna se verantwoordelikhede met haar private skoonmaakdienste vir die Great White Junction, het onder andere die publieke areas, binnehof, toilette en dies meer ingesluit. Sy sê die finale afskeid van haar drie personeellede was vir haar baie emosioneel. “Hulle kom baie jare saam met my en ons het baie geheg aanmekaar geraak,” het sy gesê. Eerstens is daar Des, wat vir 12 jaar saam met Elna as haar bekwame en getroue regterhand gewerk. “Des het altyd gesê sy is die 'generator',” vertel Elna. Die ander twee, eweneens bekwame en getroue personeellede, is Aphiwe vir 8 jaar en Piky vir 7 jaar. “Gelukkig is al drie van hulle deur die nuwe kontrakteur, Essential Cleaning Services, oorgeneem en is hulle dus nie nou sonder werk nie,” het Elna gesê.
Voorheen was Elna en haar eggenoot, wyle Piet van Zyl, twee bekende gesigte by die sentrum. Piet het sedert 2008 as Onderhoudsbestuurder van die Great White Junction gewerk, maar hy het Elna op 8 Julie 2021 ontval. Sy het kort nadat Piet daar begin werk het, in 2010 by hom ingeskakel, maar as Tuinbestuurder, asook die skoonmaakdienste. Na Piet se afsterwe het sy alleen met haar kontrakte voortgegaan. Piet se pos as Onderhoudsbestuurder is deur 'n ander persoon gevul. Elna het dus vir 15 jaar as Tuinbestuurder, asook met die skoonmaakdienste, daar gewerk.
Elna sal gemis word vir haar vriendelikheid, presiesheid en netjiese skoonmaakdienste in die sentrum, maar sal gelukkig as Tuinbestuurder steeds na die tuin en bome omsien.
Hardus Botha
