Johan en Carine Lombard van Kleinbaai, asook hulle dogter, Candice, het onlangs aan BARC se noodkreet gehoor gegee deur ‘n pragtige donasie aan Gavin Huges (Veldwwerker) te oorhandig. Dit het bestaan uit katkos, hondekos, kosbakke, hondejassies (handgemaak), kombersies (self gebrei) en dies meer.
“Dis altyd ‘n groot plesier om ‘n ietsie vir die stomme diere te gee wat nie vir hulself kan praat nie,” het Carine gesê. Johan het bygevoeg dat hulle as gesin enige ander individu of besigheid uitdaag om dieselfde te doen.
Annalie Jonker van BARC het op haar beurt laat weet dat daar gedurende die afgelope 2 maande lootjies verkoop is, met ‘n skaap op die spel. Die wenner is ‘n persoon van Belhar in die Kaap, Edmund Neethling. “Dit het maar sukkel-sukkel gedurende Maart tot Mei gegaan en ons winkel was baie stil, met donasies wat ook baie afgeneem het,” sê Annalie. “Ek het die winkel bietjie mooigemaak en ons twee dames daar, Trivina en Rene, sal in Augustus al 6 jaar vir ons in die winkel werk.”
Annalie bedank ook graag almal wat lootjies vir die skaap gekoop het en ook almal wat BARC in die algemeen ondersteun en ook hulle winkel besoek. Sy verduidelik ook dat daar ‘n groot verskil tussen welsynwerk vir diere is en die beskerming en red van diere, wat BARC se hoofdoel is. Om honde dus op ‘n gereelde basis te voer, is ‘n pragtige gebaar, maar volhoubare versorging, beskerming, behandeling en redding van mishandelde en verwaarloosde diere is ‘n perd van ‘n ander kleur - daarvoor is ondersteuning, donasies en finansies broodnodig.
BARC Animal Welfare Gansbaai kan in hierdie verband ondersteun word deur middel van donasies, ondersteuning van en skenkings aan die BARC-winkel oorkant Kekkel-en-Kraai, asook met die aanneem van diere.
Vir navrae en/of skenkings/donasies kan Annalie Jonker by 082-826-0631 geskakel word en vir diereprobleme en/of die aanneem van diere Gavin Hughes (Veldwerker) by 083-742-3903.
Hardus Botha
