“De Kleine Gansies Kleuterskool is vanjaar 30 jaar oud, met 54 kleuters, 3 onderwysers en 3 assistente,” vertel JP Coetzer, voorsitter van die Beheerraad. “Dan behartig ons ook die Nasorgsentrum by Laerskool Gansbaai.”
Fondse vir die effektiewe bedryf van die kleuterskool, asook ten opsigte van onderhoudswerk aan die gebou en speeltoerusting, bly maar altyd broodnodig. “Daarom bied ons gereeld fondsinsamelingsprojekte aan, maar wat terselfdertyd deur die gemeenskap geniet kan word.”
Vanjaar word 2015 se suksesvolle pretstap weer aangebied, en wel op Saterdag, 7 Mei 2016. “Vanjaar se ‘Julle Maak Vir Gansbaai Lekker Fun Walk’ ten bate van De Kleine Gansies word weer deur Health and Active Gansbaai (Pty) Ltd (Gym bokant Pep Stores) aangebied,” vertel Ilze Le Roux. “Inskrywingsvorms is by die Gym beskikbaar, asook by De Kleine Gansies, maar laatslapers kan ook die oggend van die Fun Walk om 08:00 inskryf.”
Die verrigtinge begin om 09:00. Deelnemers begin die pretstap by die Gym en stap in Hoofstraat tot by Frankenstraat, waar links gedraai word. Dan verby Blue Goose, waar ‘n waterpunt is, en dan verder tot by Kusweg. Vandaar word daar kuslangs verby die seeswembad gestap, waar ‘n 2de waterpunt is. Dan is die eindpunt, Stanfordsbaai volgende. Daar kan diegene wat aan die pretstap deelgeneem het, ook aan ‘n paar boeresportitems deelneem. Dit is nie verpligtend nie, maar deelnemers sal wel in die trekking geplaas word vir die "groot" pryse tydens die geluktrekkings. Dieselfde roete word weer terug gevolg tot by die gym, waar al die geluktrekkings sal plaasvind. Boereworsrolle en koeldrank sal te koop aangebied word, met ‘n springkasteel vir die kinders wat nog energie oorgehou het. Inskrywingsgeld is R50 vir volwassenes en R30 vir kinders onder 16 jaar.
Verdere navrae oor dié groot dag op 7 Mei kan aan Ilze Le Roux by 072-938-2820 gerig word, of stuur ‘n e-pos aan haar by info@healthandactive.co.za.
Hardus Botha
