Miss Teen bring haar kant

Miss Teen Commonwealth SA 2016, Alissa Coetzee (16) van De Kelders, is stewig op pad na die “Grand Finale” op 2 Julie 2016 in Pretoria. Sy is druk besig met haar projekte en die “Food Drive” projek wat sy geïnisieer het.

“Ons het Vrydag begin met ‘n ‘Food Drive’ vir Camphill School Hermanus in die Hemel-en-Aarde-Vallei,” vertel haar ma, Adéle Coetzee. “Gansbaai OK Foods het goedgunstelik ingestem om ‘n trollie beskikbaar te stel waarin almal die nodige goedere kan plaas.” Produkte soos rys, samp, langlewe melk en geblikte items soos groente, sardiens in tamatiesous en sousboontjies sal veral welkom wees.

Alissa is ‘n Miss Teen Commonwealth SA 2016 Finalis onder die Top 29 meisies, nadat een onttrek het. Alissa se ouers is André en Adéle Coetzee van De Kelders en sy is ‘n Gr 11 leerder aan Hoërskool Hermanus en ‘n gebore Gansbaaier. “My liefdadig-heidsorganisasie waarby ek aktief betrokke is, is die Butterfly Centre in Stanford, maar ek het onlangs ook ‘n oorhandiging aan Camphill School gedoen,” vertel Alissa. “Ek is mal oor kinders en geniet dit om vrywilligerswerk by die skole te doen.” Sy het ook onlangs motiveringspraatjies by Laerskool Gansbaai en Gansbaai Primêr in Blompark gelewer. “Tot nou toe is ek baie geseënd met al die mense wat my borg en ook geld aan die Butterfly Centre geskenk het,” vertel sy.

Hierdie kompetisie gee die meisies die geleentheid om hul leierskapeienskappe, modelering en openbare optredes uit te bou. Wat baie belangrik is, is dat alle deelnemers die geleentheid moet gebruik om ‘n verskil in hul gemeenskappe te maak.

Alissa Coetzee, Miss Teen Commonwealth SA 2016, hier saam met Petra van Rensburg van Gansbaai OK Foods tydens die opening van haar “Food Drive” projek.
Gansbaai_Courant