Laerskool Gansbaai se genomineerde kandidaat vir die Nasionale Onderwystoekennings vir 2016, Marlene Koekemoer, is Vrydagaand, 26 Augustus 2016 in Caledon tydens ‘n prestige funksie as die wenner in die afdeling van Uitnemendheid in Primêre Skool Onderrig aangewys.
Hiermee dring Marlene deur na die Provinsiale Toekenningsaand wat in Oktober sal plaasvind.
Onderwysers van skole uit die Overberg (Swellendam, Bredasdorp, Walkerbaai, Groenland, Overberg en Villiersdorp) is vir die volgende kategorieë vir laerskole genomineer:
Uitnemendheid in Primêre Skool Onderrig; Uitnemendheid in Primêre Skool Leierskap; Uitnemendheid in Graad R-onderrig; Uitnemendheid in Spesiale Behoeftesonderrig; Uitnemendheid in Tegnologie Ondersteunde Onderrig; Lewenslange Toekenning.
Genomineerde kandidate is deur ‘n paneel van beoordelaars oor ‘n tydperk van twee weke besoek.
Elke kandidaat moes ‘n Powerpoint-aanbieding voorberei en aanbied. Daarna is ‘n formele onderhoud met die kandidaat gevoer.
Na afloop van die onderhoud is ‘n klasbesoek gedoen en ‘n gesprek met die skoolhoof gevoer.
Laerskool Gansbaai is opreg trots op Marlene met die prestasie en wens haar net die beste toe vir die volgende uitdaging.
