Herberg-aan-See Tehuis vir Bejaardes (HaS) se gewilde jaarlikse basaar is Saterdag, 1 Oktober 2016 vanaf 10:00 in die Pretoriussaal en is ‘n basaar wat nie gemis mag word nie - veral nie onder die bekwame leiding van die gedugte Goue Hande nie.
Vanjaar het Jan le Roux met ‘n bykomende idee gekom: Radiobeheervliegtuie op Laerskool Gansbaai se rugbyvelde, direk langs die Pretoriussaal. Alle belangstellendes met radiobeheervliegtuie is welkom om aan hierdie aktiwiteit deel te neem en kan voor 10:00 al opdaag. Besoekers aan die basaar sal hulself in die “manne met die duur speelgoed” se lugmanewales kan verlustig.
Voorsiening is gemaak om van te kies en te keur, ‘alles by die dosyne’: kleinkoekies, groot koeke, terte, “crispy” koeksisters, nagereg, pannekoeke, vleisgeregte, vars vleis en groente, tombolatafel, naaldwerktafels, wit-olifanttafel en veel, veel meer - kom kyk eerder self. Die restaurant met heerlike etes moet ook nie vergeet word nie. Die spreekwoordelike tafel is nou, ná maande se harde arbeid, gedek en elke sent wat spandeer word, sal wees ter stywing van HaS se broodnodige fondse waarsonder die tehuis nie op ‘n gesonde vlak bedryf kan word nie.
Op die laaste nippertjie-navrae kan aan Francia van Dyk by 028-384-0262 of 082-551-3613 gerig word.
‘n Belangrikke wenk: wees betyds of wees tevrede om met leë hande huiswaarts te keer - wanneer die predikant ‘amen’ sê, is sommige besoekers se drasakke al volgepak.
