Die bekende en gewilde Baardskeerdersbos Orkes het oor ‘n tydperk van 27 jaar diep spore in die Suid-Afrikaanse boeremusiek wêreld getrap.
Die dood van die immer-gewilde orkesleier, Manie Groenewald was ‘n reuse terugslag en nog ‘n lid, Dries van Bosch, hul konsertina-speler, is ook oorlede. Piet Smit met sy trekklavier, het intussen besluit om af te tree.
Liana Fourie laat weet egter dat die orkes steeds optree – met nuwe bloed en nuwe energie.
Die oorblywende orkeslede, Stompie Heyns, André Fourie en Stephan van der Westhuizen het besluit om voort te bou op Manie Groenewald se kosbare nalatingskap.
Heelparty van die oorspronklike orkeslede was direk of indirek familielede. Die groep het besluit om nog familielede te betrek, soos neefskinders en kleinneefs wat voor Manie grootgeword het. “Die doel daarmee is om hulle te betrek by die voortsetting van ‘n besonderse kultuur en styl wat deur Manie Groenewald nagelaat is,” het Liana gesê. “Daarom is ons van plan om die Baardskeerdersbos Orkes se suksesse van die verlede voort te sit.”
Tans bestaan die orkes uit die volgende lede: Stompie Heyns (Banjo), André Fourie (kitaar en sang), Stephan van der Westhuizen (dromme), Stoffel Fourie (kitaar en sang), Neil Aspeling (trekklavier) en Tobie Keyser (konsertina).
