Na ‘n lang, besige pad na Gansbaai, is vakansiegangers verlede Donderdag verras met ‘n ‘vriendelike’ padblokkade by die De Kelders ingang. Lede van Gansbaai Toerisme en Gansbaai Polisiëringsforum (GPF), in samewerking met die plaaslike SAPD, het verbaasde motoriste welkom geheet met paaseiers, brosjures met spesiale aanbiedinge in die omgewing, ‘n Gansbaai Courant en veiligheidswenke.
Hierdie padblokkades word jaarliks ‘n dag voor die Paasnaweek en kort voor die Kersvakansie gehou.
Motorbestuurders wat die dorp binnekom, bekyk die padblokkade aanvanklik bekommerd en begin outomaties soek na hulle bestuurderslisensiekaarte, net om vriendelik verwelkom te word in hierdie pragtige deel van ons land.
“Ons het 150 pakkies gehad en alles is uitgedeel, ondanks reënbuie wat kort kort uitgesak het,” vertel Glenda Kitley, Bestuurder: Gansbaai Toerisme.
Franskraal Buurtwag
Franskraal Buurtwag het op dieselfde dag, Donderdag 13 April, in samewerking met Gansbaai SAPD ook ‘n vriendelike padblokkade in Franskraal gehou.
Ander rolspelers was ook betrokke, soos die plaaslike verkeersowerheid, Cape Nature en Seevisserye.
Die doel van hierdie padblokkade was om inwoners en vakansiegangers bewus te maak van veiligheid by vakansiehuise en in die omgewing, misdaad en die belangrike rol wat 'n buurtwag speel.
Ook hier is gedrukte veiligheidswenke aan motorbestuurders uitgedeel en paaseiers aan die kinders.
