Vreugde oor 1ste Skooldrag

Hierdie tyd van die jaar speel 'n bedrywige toneel hom voor Gansbaai Pep Stores af. Sowat 95+ Gr1-leerders is vanjaar elk met 'n volledige skooluniformstel, wat aan die basiese behoeftes voldoen, toegerus.

Donateurs van skoolklere saam met 'n deel van die groot hoe-veelheid Gr 1-leerders, met agter vlnr Flip Fourie,  Rouxlè Coetzer (Pep Stores), past Frikkie Zeelie, Eben Visser, Magda Goedde en JP Coetzer. 

So 'n pakkie bevat 'n broek/romp, hemp/bloes, sokkies, skoene en 'n rugsak, met 'n totale waarde van sowat R300+. Die groothartige Gansbaai Christian Academy (GCA) het 5 jaar gelede al met hierdie pragtige inisiatief vorendag gekom.

"Vanjaar is dit ons vyfde jaar en ons hou maar aan met uitdeel totdat die tou hierbuite ophou," het past Frikkie Zeelie met 'n glimlag gesê. Past Zeelie is deur Flip Fourie en Rob Koppel vergesel en die GCA het sowat 50+ van die pakkies aan Gr 1-leerders uitgedeel.

Verlede jaar het die ewe ruimhartige Gansbaai Melodrama Kindertrust hulle by hierdie liefdadigheidsprojek geskaar. Met hulle tweede deelname vanjaar het hulle 35 Gr 1-leerders van skooluniforms voorsien. JP Coetzer van Gansbaai Melodrama is deur Magda Goedde vergesel.

Die GCA se saadjie wat hulle 5 jaar gelede geplant het, het vanjaar nog verder gegroei met Secma International Security in Gansbaai se toetrede tot die projek.

Eben Visser homself was daar om toe te sien dat Secma op hul beurt vir pakkies aan 10 Gr 1-leerders gesorg het.

"Hierdie is drie van die uitsonderings, maar daar is etlike individue wat ook 1 of meer Gr 1-leerders met so 'n pakkie toerus," vertel Rouxlè Coetzer van Pep Stores. Gansbaaiers met die ruim harte, só is al vele male berig.                                                         
Hardus Botha