‘Wit Kersfees’ in Uilenkraalsmond
Lesers wat nie die voorreg het om ‘n ‘Wit Kersfees’ (White Christmas) oorsee te kan ervaar nie, gaan loer gerus in by Plot 1 van Jeanette Roux in Uilenkraalsmond - dit sal deur en deur die moeite werd wees en nader aan ‘n ‘Wit Kersfees’ as dít, kan mens nie kom nie.
Jeanette het buitengewone moeite met haar beplanning en voorbereiding gedoen. Die meeste van wat te sien is, het sy self vervaardig, maar op kleinskaal volgens die werklike beelde, geboue en besienswaardighede in Holland. Dan het sy ook heelparty items self in Holland gaan haal en hierheen gebring, selfs sneeu - van busse, motors, trokke, huise en, noem maar op, alles is volgens skaal vervaardig.
Foto’s kan nie Jeanette se ‘Lighuis’ in Uilenkraalsmond beskryf nie, ‘n persoonlike besoek is noodsaaklik - “mens raak skoon verlore om alles te besigtig,” het iemand gesê. Sy het ook self haar Kersboom gemaak en daar is onder ander ‘n houtvervaardigde slee met ‘n Kersvader waar foto’s teen ‘n donasie van R5 geneem kan word - en vergeet nie van die kompleet sneeu-ysskaatsbaan nie!
Vir ‘n ‘Wit Kersfees’ soos nog nooit gesien nie, gaan kyk gerus na Jeanette se ‘Lighuis’.
Hardus Botha
