Birkenhead Boothengelklub
Pragtige 6.75kg witsteenbras
Mooi visse is tydens die Birkenhead Boothengelklub se maandelikse kompetisie op Saterdag, 1 Februarie 2025 gevang - maar die een wat die aandag getrek het, was Johan Southey met sy pragtige wit steenbras van 6.75kg. Die enigste hengelaar wat sy kwota kon vang, was Philip Fourie - knapgedaan, Philip!
Dit was maar 'n moeilike oggend met die vis wat eers laat begin byt het, maar die wag was die moeite werd. Dit was 'n groot verrassing om te sien dat Jean Downing, na 'n lang tyd van afwesigheid, weer aan die kompetisie deelgeneem het - en toe palm hy sommer die 2de Swaarste Bootgemiddeld met sy boot, Releks II, in - welkom terug, Jean.
Kompetisie-uitslae
9 bote het ingeskryf, waarvan al 9 ingeweeg het. Die totale bemanningslede was 28, waarvan 1 'n dame was wat deelgeneem het. Die aantal visse (8 spesies) wat ingeweeg is, was 97, met 'n totale massa van 80.35kg. Die gemiddelde massa per hengelaar was 2.87kg.
Volledige uitslae
Swaarste vis, Johan Southey (wit steenbras, 6.75kg); 2de Swaarste vis, Johan Eloff (geelbek, 3.0kg); Swaarste sak, Johan Southey (9.4kg); 2de Swaarste sak, Philip Fourie (6.45kg); Swaarste bootgemiddeld, WaCa van Carl Dyer (4.93kg); 2de Swaarste bootgemiddeld, Releks II van Jean Downing (3.88kg); Dames swaarste sak, Trix Langley (2.15kg).
Voorlopers
1ste 3 Bootkampioene:
WaCa van Carl Dyer (17.86kg); GI Joe van Joe Smit (16.63kg); Oupa van Ben Uys (14.43kg).
1ste 3 Visvangkampioene Mans:
Joe Smit (20.35kg); Philip Fourie (19.80kg); Marinus Kleyn (18.25kg); Derick Petersen (18.05kg), 4de, maar só naby, moet gemeld word.
Visvangkampioene Dames:
Joey Rademeyer (11.55kg); Trix Langley (5.60kg); Anita Vermeulen (5.49kg).
Visvangkampioene Juniors:
Ruan Langley (7.60kg).
Hardus Botha
