Blink ogies oor geskenkpakkies
Opgewonde kinders van Elim Outreach, Gansbaai, het op Dinsdag, 28 Januarie 2025, in groot afwagting voor die tafel met kleurvolle geskenkpakkies saamgedrom.
Die weldoeners was die Vriende van Kuslangs Restaurant onder leiding van Collin van der Merwe en hy is deur Barnie Germishuys vergesel. Met die aankoms van Elim Home se Oorhoofse Hoof, Lucinda Cunningham, is die geskenkpakkies amptelik deur Collin aan haar oorhandig - die pakkies was gevul met skryfbenodigdhede, skryfboekies en inkleurboeke. Lekkergoedpakkies, wat dalk meer aandag as die geskenkpakkies ontvang het (!), is ook aan die sowat 22 kinders uitgedeel. Elmarie Fourie, Arbeidsterapeut, het ook die oorhandiging bygewoon.
“Ons is 'n groep vriende wat op liefdadigheidswerk fokus,” het Collin gesê. “Vir vandag se oorhandiging het ons 'n spitbraai onderling gereël om fondse vir die geskenke in te samel.” Collin vertel dat hulle volgende groot projek vir Elim teen einde November vanjaar sal realiseer. “Ons beplan twee Kerspartytjies, een vir Elim Outreach, Gansbaai en een vir Elim Kinderhuis (Elim), waar daar sowat 51 inwoners is,” het Collin gesê. “Daar sal beslis 'n Kersvader wees wat die geskenke gaan uitdeel.”
Hardus Botha
