Hoe rooier hoe mooier - Bietoubos Damesklub
“Ons het besluit om ons byeenkoms 'n dag of wat voor 14 Februarie vir Valentynsdag-vieringe te gebruik,” het Elizma de Lange, voorsitter van die Bietoubos Damesklub tydens hulle byeenkoms op Dinsdag, 11 Februarie 2025, gesê. “Die dag speel nie 'n rol nie, Februariemaand is mos die maand van 'Liefde' en hoe rooier, hoe mooier.” Sy het die manne in die koor spesiaal tussen die rooi-geklede dames verwelkom.
Die gedugte span dames van Aletta Löchner en Marie de Jager was die gasvrouens en hulle het gesorg dat die 'liefde' van Valentynsdag behoorlik 'aangevoel' kon word. Die kostafel was oorlaai met smaaklike vrugteslaai en roomys - moeilik gewees om net foto's te neem en nie stilletjies te proe nie!
Die feestelike stemming is afgeskop met die talentvolle Gideon Naude en sy saxofoon. Gideon het die eerste vier gedeeltes van 'Six Studies in English Folk Songs' deur Ralp Vaughan-Williams op sy saxofoon gespeel. Daarna het 'n groep lede van die NG-Kerkkoor, onder leiding van Aletta en met klavier-begeleiding deur Pikkie Louw, aan die beurt gekom. Hulle het begin met 'Gebed' van Koos du Plessis en daarna 'Any dream will do' van Andrew Loyd Weber. Op aandrang van die gaste, het hulle nog 'n paar liedere gesing.
Pikkie het 'n spesiale geskenk van Aletta ontvang en Marie het geskenkpakkies (liefdesgeskenkies?) aan die manlike koorlede oorhandig. Die lootjiewenner van die dag was voorsitter Elizma.
Kort na die optredes, het Aletta die pragtige lied, 'Highway van my Hart' aan die groep soos 'n gedig voorgelees, waarvan die 3de strofe soos volg lees: “Ons brand ons grou verlede se beloftes / word nou één; Twee siele word verening - soos trane in die reën; Ek wil grys word saam met jou, elke asem binne teug, want die langpad wat ek loop, is die kortpad na jou!”
Hardus Botha
