Gansbaai Lionsklub se 31ste Lionpresident ingehuldig
Die jaarlikse induksie, of te wel Presidentsinhuldiging, van Gansbaai Lionsklub se nuwe Lionpresident op Saterdag, 7 Junie 2025 in die Great White House, was vanjaar 'n prestige geleentheid, maar gesellig soos altyd. Pieter de Vries is vir 'n tweede termyn as Gansbaai Lionsklub se 31ste Lionpresident sedert 1987 vir die termyn 2025-2026 deur Distriksgoewerneur Jose Braga Borges ingehuldig. Wat vanjaar se geleentheid nog meer spesiaal gemaak het, is dat die inhuldiging op Lions Internasionaal se Stigtingsdatum 107 jaar gelede plaasgevind het.
Lion Gert Louw was seremoniemeester en het die verwelkoming behartig. Die jaarlikse inhuldiging van 'n Lionpresident is 'n plegtige geleentheid wat bepaalde prosedures insluit: Vlagplegtigheid (Lion Marietta Hattingh), Lions Invokasie (Lion Marilda Louw); Lions Geloof (Lion Ina Ogilvie); 'n Heildronk op Lions RSA (Lion Ina Ogilvie); 'n Heildronk op Lions Internasionaal (Lion Boats van Staden).
In sy boodskap het Lionpresident Pieter gesê hy het volle vertroue in sy Besigheidsraad om die termyn vir 2025-2026 aan te pak. “Namens Gansbaai Lionsklub nooi ek graag alle 'nuwe oud-Lionintrekkers' uit om my te kontak en of ons vergaderings by te woon,” het Lionpresident Pieter gesê. “Ons sal ook almal moet saamwerk om nuwe lede ingehuldig te kry - dit sal almal se take ligter maak, maar veral ons klub versterk.” Hy is sowat 16 jaar gelede as Lion ingehuldig en het sedertdien in bykans al die onderskeie portefuljes gedien, insluitend Lionpresident vir 2018-2019, 2024-2025 en nou ook vir 2025-2026.
Lionpresident Pieter het ook sy Besigheidsraad (Kabinet) vir 2025-2026 bekendgemaak: hyself as verkose Lionpresident, Boats van Staden (1ste Visie-President), Ina Ogilvie (Klubtesourier), Mariëtta Hatting (Klubsekretaris en Klub LCIF Koördineerder), Corrie Schutte (Lidmaatskapvoorsitter) en René Mouton (Bemarkingsvoorsitter). Drie nuwe lede is ook tydens die geleentheid ingehuldig: Riaan van Deventer, René Mouton en Carmelita Fitzgibbon.
Na afloop van die verrigtinge kon die Lions 'n gesellige aand en saamkuier in die Great White House geniet. Die Redaksiespan van die Gans-Berg Nuus wens Lionpresident Pieter de Vries geluk met sy verkiesing as Lionpresident en wens hom en sy span sterkte toe vir die termyn wat voorlê.
(Foto's is verskaf)
Hardus Botha
