Wanneer jy induik vir ’n natmakertjie moet jy dalk sekere voorsorgmaatreëls tref om die bakterieë en parasiete wat in die water skuil,
te vermy. Een van die grootste gevare is die kinderswembad. Warm, vlak water en kinders in swemdoeke - wat nie feses doeltreffend kan binne hou nie - kan die perfekte teelplek wees vir waterverwante infeksies, selfs al word die water met chloor behandel. Die beste manier om te voorkom dat klein kinders siek raak, is om te voorkom dat hulle daardie water insluk.
Hier is nog ’n paar waterwenke:
- Hou kinders wat enige vorm van gastroïntestinale siektes gehad het vir ’n paar dae lank weg van swembaddens af om te voorkom dat die water besmet word.
- Moenie water sluk wanneer jy in varswatermere of strome is nie. Die moontlike bakteriële infeksie kan koors tesame met hoofpyn en spierpyn veroorsaak, maar dit kan gewoonlik behandel word.
- Soutwater hou gewoonlik minder risiko van bakterieë en parasiete in, maar swemmers moet uit die water bly as hulle ’n sny of wond het wat kan ontsteek.
- Bly ook weg van jellievisse wat op die seeoppervlak dryf. Die meeste mense besef nie dat die tentakels van sekere jellievisse, spesifiek die bloublasie, vier tot ses meter lank kan wees nie. Bly dus op ’n veilige afstand om nie gesteek te word nie.
