Koronavirussiekte (COVID-19) Hoe Om Jouself Te Beskerm
Die meeste mense wat siek word, word effens siek en herstel, maar vir party kan dit erger wees.
Kyk na jou gesondheid en beskerm ander deur die volgende te doen:
Was jou hande gereeld:
HOEKOM? As jy jou hande deeglik met seep en water was of alkoholgebaseerde handwasmiddels gebruik, maak jy virusse dood wat dalk op jou hande kan wees.
Droog jou hande met ’n skoon, vars papierhanddoek af en gooi dit dadelik na gebruik weg.
Handhaaf sosiale afstand:
Handhaaf ten minste een meter tussen jouself en enigiemand wat hoes of nies. HOEKOM? Wanneer iemand hoes of nies, versprei daar klein druppels uit hulle neus of mond, en dit kan die virus bevat.
As jy te naby is, kan jy die druppels wat die COVID-19 virus bevat, inasem as die persoon wat hoes die siekte het.
Moenie aan jou oë, neus en mond vat nie: HOEKOM? Hande vat aan baie oppervlakke en tel virusse op. Sodra dit besmet is, kan hande die virus na jou oë, neus of mond versprei. Die virus kan so jou liggaam binnekom en jou siek maak.
Handhaaf respiratoriese higiëne:
HOEKOM? Maak seker jy en die mense om jou handhaaf goeie respiratoriese higiëne.
Dit beteken om jou mond en neus met jou gebuigde elmboog of ’n snesie te bedek wanneerjy hoes of nies. Gooi dan dadelik die gebruikte snesie weg. Druppels versprei die virus. Met goeie respiratoriese higiëne beskerm jy die mense om jou teen die COVID-19 virus.
As jy koors het, hoes of sukkel om asem te haal, kry betyds mediese sorg: Bly by die huis as jy nie lekker voel nie. As jy koors het, hoes, en sukkel om asem te haal, kry mediese hulp en bel voor die tyd. As jy vooraf bel, gee dit jou gesondheidsorgverskaffer kans om jou vinnig na die regte gesondheidsfasiliteit toe te stuur. Dit sal jou en diegene rondom jou beskerm en help om die verspreiding van virusse en ander infeksies te voorkom. Bly ingelig en volg advies wat deur jou gesondheidsorgverskaffer gegee word.
Hoe om spanning gedurende hierdie virusuitbreking te hanteer: Dit is normaal om hartseer, gespanne, deurmekaar, bang of net gewoon kwaad te wees tydens ’n krisis. Dit kan help om met mense te praat wat jy vertrou.
Waar en hoe om maskers te gebruik: As jy gesond is, hoef jy slegs ’n masker te dra as jy iemand met ’n vermoedelike koronavirusinfeksie versorg. Dra ’n masker as jy hoes of nies. Maskers is slegs effektief as jy ook gereeld jou hande met alkoholgebaseerde middels of seep en water was.
Hoe om ’n masker aan te sit, te gebruik en weg te gooi:
- Was jou hande met ’n alkoholgebaseerde handwasmiddel of seep en water voordat jy ’n masker aansit.
- Maak jou mond en neus toe met die masker en maak seker daar is geen gapings tussen jou gesig en die masker nie.
- Moenie aan die masker vat terwyl jy dit dra nie. As jy dit doen, was eers jou hande met ’n alkoholgebaseerde handwasmiddel of seep en water.
- Vervang die masker met ’n nuwe een sodra dit klam is en moenie enkelgebruikmaskers weer gebruik nie.
- Verwyder die masker van agter af (moenie aan die voorkant raak nie) en gooi dit dadelik weg in ’n toe asblik.
- Was dadelik jou hande met ’n alkoholgebaseerde handwasmiddel of seep en water.
